వైరల్ ఇన్ఫెక్షన్ల తర్వాత ఈ 5 లక్షణాలు కనిపిస్తే.. అస్సలు నిర్లక్ష్యం చేయొద్దు!

సీజనల్ ఫ్లూ, కోవిడ్-19 లేదా ఇతర వైరల్ ఇన్ఫెక్షన్లు సోకినప్పుడు జ్వరం, ఒళ్లు నొప్పులు, నీరసం వంటి లక్షణాలు రావడం సర్వసాధారణం. విశ్రాంతి తీసుకుంటే కొద్ది రోజుల్లోనే కోలుకుంటామని చాలామంది భావిస్తారు. కానీ, కొన్ని సందర్భాల్లో వైరస్‌లు కేవలం శ్వాసకోశ వ్యవస్థకే పరిమితం కావు. వైరస్‌ను ఎదుర్కొనేందుకు శరీరం సృష్టించే తీవ్రమైన ఇన్‌ఫ్లమేటరీ రెస్పాన్స్ (వాపు ప్రక్రియ) ఒక్కోసారి గుండెపై దాడి చేసి, ప్రాణాంతక పరిస్థితులకు దారితీస్తుంది. ఈ మార్పును సకాలంలో గుర్తించడం చాలా ముఖ్యం.

సాధారణ వైరల్ ఇన్ఫెక్షన్ గుండె సమస్యగా మారినప్పుడు కనిపించే కీలక హెచ్చరిక సంకేతాల గురించి వైద్య నిపుణులు కీలక విషయాలు వెల్లడించారు. "వైరస్‌లు ఎప్పుడూ శ్వాసకోశ వ్యవస్థ లేదా జీర్ణాశయానికే పరిమితం కావు. కొన్నిసార్లు శరీరం యొక్క తీవ్రమైన రోగనిరోధక ప్రతిస్పందన హృదయనాళ వ్యవస్థను లక్ష్యంగా చేసుకుంటుంది. ఇది మయోకార్డైటిస్ (గుండె కండరాల వాపు) లేదా పెరికార్డైటిస్ (గుండె బయటి పొర వాపు) వంటి ప్రమాదకరమైన పరిస్థితులకు దారి తీస్తుంది" అని అన్నారు.

నిర్లక్ష్యం చేయకూడని 5 హెచ్చరిక సంకేతాలు

1. శరీర భంగిమను బట్టి మారే ఛాతీ నొప్పి: దగ్గినప్పుడు వచ్చే కండరాల నొప్పి వేరు, గుండె నొప్పి వేరు. ఛాతీలో బరువుగా నొక్కినట్లు లేదా పిండినట్లు అనిపిస్తే అది గుండె సంబంధిత నొప్పి కావచ్చు. "వెల్లకిలా పడుకున్నప్పుడు ఛాతీ నొప్పి పెరిగి, ముందుకు వంగినప్పుడు కొద్దిగా తగ్గితే, అది వైరల్ ఇన్ఫెక్షన్ వల్ల కలిగే పెరికార్డైటిస్‌కు స్పష్టమైన సంకేతం" అని వైద్య నిపుణులు తెలిపారు.

2.తీవ్రమైన ఆయాసం: జలుబు, బ్రాంకైటిస్ వంటి సమస్యలతో బాధపడుతున్నప్పుడు ఆయాసంగా ఉండటం సాధారణమే. కానీ, బాత్రూమ్‌కు నడవడం లేదా కూర్చున్న చోట కూడా శ్వాస తీసుకోవడానికి ఇబ్బంది పడుతుంటే, మీ గుండె రక్తాన్ని సమర్థవంతంగా పంప్ చేయలేకపోతోందని అర్థం. అర్ధరాత్రి హఠాత్తుగా ఊపిరాడక మెలకువ రావడం అత్యంత ప్రమాదకరమైన సంకేతం.

3.వేగవంతమైన లేదా అస్థిరమైన హృదయ స్పందన: జ్వరం ఉన్నప్పుడు శరీర జీవక్రియ పెరిగి గుండె వేగంగా కొట్టుకోవడం సహజం. కానీ, జ్వరం తగ్గిన తర్వాత కూడా గుండె దడదడలాడుతున్నా, వేగంగా కొట్టుకుంటున్నా అది అరిథ్మియా (అస్థిర హృదయ స్పందన)కు సంకేతం కావచ్చు.

4.శరీరంలో వాపులు, బరువు పెరగడం: వైరస్ కారణంగా గుండె బలహీనపడినప్పుడు, రక్తాన్ని సరిగా పంప్ చేయలేదు. దీంతో శరీరంలో ద్రవాలు పేరుకుపోతాయి. "చీలమండలు, పాదాలు లేదా కాళ్లలో అకస్మాత్తుగా వాపులు రావడం, సాక్సులు తీసినప్పుడు చర్మంపై లోతైన గుంటలు పడటం, 24 నుంచి 48 గంటల్లో హఠాత్తుగా బరువు పెరగడం వంటివి గుండెపై ఒత్తిడికి సంకేతాలు" అని హెచ్చరించారు.

5.తీవ్రమైన నీరసం, కళ్లు తిరగడం: వైరల్ ఇన్ఫెక్షన్ నుంచి కోలుకోవడానికి సమయం పడుతుంది, కానీ శక్తి స్థాయిలు క్రమంగా పెరగాలి. అలా కాకుండా, ఒకరోజు బాగానే ఉండి మరుసటి రోజు అకస్మాత్తుగా తీవ్రమైన నీరసం, కళ్లు తిరగడం లేదా స్పృహ తప్పడం వంటివి జరిగితే, అది గుండె పనితీరు మందగించడం వల్ల రక్తపోటు పడిపోవడానికి సూచన కావచ్చు.

శాస్త్రీయ ఆధారాలు ఏం చెబుతున్నాయి?
వైరస్‌ల వల్ల గుండెకు నష్టం వాటిల్లుతుందనడానికి బలమైన శాస్త్రీయ ఆధారాలున్నాయి. 'ఓపెన్ హార్ట్ జర్నల్'లో ప్రచురించిన ఒక అధ్యయనం ప్రకారం.. ఫ్లూతో పోలిస్తే కోవిడ్-19 బారిన పడిన వారిలో మయోకార్డైటిస్ ముప్పు మూడు రెట్లు ఎక్కువగా ఉన్నట్లు తేలింది. వైరల్ ఇన్ఫెక్షన్ల వల్ల కలిగే వాపు ప్రక్రియను ముందుగానే గుర్తిస్తే, దీర్ఘకాలిక నష్టాన్ని, హార్ట్ ఫెయిల్యూర్‌ను నివారించవచ్చని 'కరెంట్ ప్రాబ్లమ్స్ ఇన్ కార్డియాలజీ జర్నల్'లో ప్రచురించిన మరో విశ్లేషణ నొక్కి చెప్పింది.

"ఇది మామూలు ఫ్లూ లక్షణమే కదా అని ఈ సంకేతాలను అస్సలు నిర్లక్ష్యం చేయవద్దు. వెంటనే వైద్య సహాయం తీసుకోవాలి. వైరల్ ఇన్ఫెక్షన్ వల్ల గుండెకు కలిగే సమస్యలను ముందుగానే గుర్తిస్తే, శాశ్వత నష్టం జరగకుండా నివారించవచ్చు" అని వైద్య నిపుణులు సూచించారు.